2012, ഏപ്രിൽ 8, ഞായറാഴ്‌ച

വെളുത്ത സുന്ദരികളും ചില മേയ്ക്കപ്പ്,ഫോട്ടോഗ്രാഫി തത്വങ്ങളും ......


''Nothing in biology makes sense, except in the light of evolution.''Theodosius Dobzhansky


കഴിഞ്ഞ പോസ്റ്റില്‍ എല്ലാ കാലത്തും വെളുപ്പുനിറം സൌന്ദര്യത്തിന്റെ യൂണിവേഴ്സല്‍ ലക്ഷണമായിരുന്നെന്നു നമ്മള്‍ കണ്ടിരുന്നു.(കറുത്ത സുന്ദരികളുണ്ടോ?) ലോകത്തെല്ലായിടത്തും,പുരുഷന്മാരുടെ  നിറം എന്തായാലും സ്ത്രീകളുടേത് പുരുഷന്മാരേക്കാള്‍ വിളറിയ നിറമാണ്.പക്ഷേ എന്തുകൊണ്ട്?പല സ്ഥലങ്ങളില്‍ പല കാലത്തായി ജീവിച്ചിരുന്നവരുടെയെല്ലാം സൌന്ദര്യ സങ്കല്‍പ്പങ്ങളില്‍  അവരുടെ സ്ത്രീകള്‍ വെളുത്തവരാകാന്‍ കാരണമെന്തായിരിക്കും?(പലര്‍ക്കും ആ പോസ്റ്റു വായിച്ചതിനു ശേഷവും അത് സമ്മതിക്കാന്‍ മടിയാണ്.അത് പോട്ടെ.)

തൊലിയുടെ നിറം ഒരു സങ്കീര്‍ണ്ണ പ്രശ്നമാണ്.സാധാരണ പറയപ്പെടുന്ന ഹൈപ്പോത്തെസിസ്സുകള്‍ക്ക് (white male-imposed or multinational corporate conspiracy) ധാരാളം പ്രശ്നങ്ങളുണ്ട്. മുന്‍പ്  പറഞ്ഞപോലെ വെളുപ്പുനിറം സ്ത്രീകളുടെ മാത്രം സൌന്ദര്യ ലക്ഷണമാണ്. പുരുഷന്മാരുടെതല്ല.സ്ത്രീകളുടെ നോട്ടത്തില്‍ പുരുഷന്‍മാര്‍ 'tall dark and handsome' ആയിരിക്കണമെന്നാണ് അവരുടെ  താല്പര്യം.അപ്പോള്‍ ചോദ്യം ഇതാണ്..... സ്ത്രീകളില്‍ വെളുത്തനിറമാണ് സൌന്ദര്യ ലക്ഷണം എന്നത് വെള്ളക്കാരനായ പുരുഷന്റെ മേധാവിത്തമാണെങ്കില്‍ അതായത് അവന്റെ സ്ത്രീകളുടെ നിറം  ലോകമെമ്പാടുമുള്ള സ്ത്രീകളുടെ നിറമായി അടിച്ചേല്‍പ്പിച്ചതാണെങ്കില്‍ വെള്ളക്കാരന്‍ പുരുഷന് അവന്റെ നിറം എന്തുകൊണ്ട് ലോകത്തുള്ള സ്ത്രീകളുടെ പുരുഷ സങ്കല്‍പ്പങ്ങളെ സ്വാധീനിക്കുന്ന  വിധം അടിച്ചേല്‍പ്പിക്കാന്‍ കഴിയുന്നില്ല?അവിടെ എന്തുകൊണ്ട് ഈ 'white male-imposed conspiracy' പരാജയപ്പെടുന്നു? എന്തുകൊണ്ട് വെള്ളനിറം എന്ന കോര്‍പ്പറേറ്റ് ഗൂഢാലോചന സ്ത്രീകളില്‍  മാത്രം വിജയിക്കുന്നു?

സൌന്ദര്യവര്‍ദ്ധക നിര്‍മ്മാതാക്കളുടെ പ്രചാരണമാണ് സ്ത്രീകള്‍ ചമഞ്ഞൊരുങ്ങി നടക്കുന്നതിനു കാരണം,(അല്ലാതെ അവര്‍ക്ക് 'ശരിക്കും' ഇഷ്ടമുണ്ടായിട്ടല്ല.) എങ്കില്‍ ഈ  ഗൂഢാലോചനക്കാര്‍ എന്തുകൊണ്ട് ആണുങ്ങള്‍ക്കുവേണ്ടിയും അത്തരം മേക്കപ്പ് സമഗ്രഹികള്‍ പ്രചരിപ്പിച്ച് ലാഭം പതിന്മടങ്ങ്‌ വര്‍ദ്ധിപ്പിക്കുന്നില്ല?(പുരുഷന്മാരുടെ ലിപ്സ്റ്റിക്കും കണ്‍മഷിയുമൊക്കെ  കാണേണ്ടതല്ലെ?) പുരുഷ സൌന്ദര്യ വസ്തുക്കള്‍ ഇപ്പോഴും മിക്കവാറും ഷേവിംഗ് ക്രീമും മറ്റും മാത്രമാണ്. ഈയിടെയായി മാത്രം ഇവിടെ കാണുന്ന പുരുഷന്മാരുടെ തൊലിവെളുപ്പിക്കല്‍ ക്രീമിന്  ഇപ്പോഴും കാര്യമായ മാര്‍ക്കറ്റൊന്നുമില്ല.(ലോകവ്യാപകമായി നോക്കിയാല്‍ സ്ത്രീകളുടെ മാര്‍ക്കറ്റ്‌ ഷെയറിന്റെ ആയിരത്തിലൊരംശം വരില്ല പുരുഷന്മാരുടേത്.) എന്തായിരിക്കും കാരണം?You need a  better theory than favoritism toward lighter skin is an invention of Hollywood/corporates/male domination.

കൂടുതല്‍ സൂര്യപ്രകാശമേല്‍ക്കുന്ന സ്ഥലങ്ങളില്‍ ആളുകള്‍ക്ക് കൂടുതല്‍ കറുത്ത നിറമായിരിക്കും എന്നതും പൂര്‍ണ്ണമായി ശരിയല്ല. അതുമാത്രമായിരിക്കില്ല കാരണം. ചിത്രം നോക്കുക.ആഫ്രിക്കയില്‍ തന്നെ  നല്ല കറുപ്പുനിറമുള്ളവരും അത്രയൊന്നും കറുപ്പില്ലാത്തവരേയും കാണാം. ഭൂമധ്യരേഖയോടടുത്ത് കറുത്തനിറമുള്ളവരെയും ഇരുനിറമുള്ളവരെയുമൊക്കെ കാണാം. അതുപോലെ അമേരിക്കന്‍  ഇന്ത്യക്കാര്‍ക്ക്, ഭൂമധ്യരേഖയോടടുത്തും അകലെയും കഴിയുന്ന അവര്‍ക്ക് ഉടനീളം ഇരുണ്ട നിറമാണ്. സൂര്യപ്രകാശം കുറവ് ലഭിക്കുന്ന എസ്കിമോകളും നല്ല കരുമാടിക്കുട്ടന്മാരാണ്. ഇതൊക്കെ എങ്ങിനെ  വിശദീകരിക്കും?

കഴിഞ്ഞ പോസ്റ്റില്‍ നമ്മള്‍ സ്ത്രീപുരുഷന്മാര്‍ തമ്മില്‍ തന്നെ നിറവ്യത്യാസമുണ്ടെന്ന് കണ്ടിരുന്നു. സ്ത്രീകള്‍ അതെ വര്‍ഗ്ഗത്തിലെ പുരുഷന്മാരേക്കാള്‍ വെളുത്തവരായിരിക്കും. സ്ത്രീകളില്‍  കറുപ്പുനിറത്തിന് കാരണമായ മെലനോസൈറ്റുകളുടെയും അവരുടെ രക്തത്തില്‍ ഹിമോഗ്ലോബിന്റെയും അളവു കുറവ്,അവരുടെ തൊലിക്കടിയിലെ കൊഴുപ്പിന്റെ പാളി രക്തനിറത്തിന്റെ പ്രതിഫലനം  കുറയ്ക്കുന്നു, ഇതൊക്കെ കാരണങ്ങളാണ്.പക്ഷേ എന്തുകൊണ്ട് അങ്ങനെ?ആ ആത്യന്തിക കാരണം എന്തായാലും അവയൊക്കെ പരിണാമ സിദ്ധാന്തത്തിനു നിരക്കുന്നതായിരിക്കണം എന്ന് പ്രത്യകം  പറയേണ്ടതില്ലല്ലോ.There is no escaping Darwin's dangerous idea.പരിണാമത്തില്‍നിന്ന് ഒന്നും ഒഴിവാക്കപ്പെടില്ല. വെയിലുകൊണ്ട് കറുത്ത ആളുകള്‍ അവരുടെ നിറം അടുത്ത തലമുറയിലേക്ക്  പകര്‍ന്നു എന്നൊന്നും ചുമ്മാ പറഞ്ഞിട്ട് കാര്യമില്ല. അതസാധ്യമാണ്.(അത് ലാമാര്‍ക്കിസമാണ്, ഡാര്‍വ്വിനിസമല്ല.)

''Seen in the light of evolution, biology is, perhaps, intellectually the most satisfying and inspiring science. Without that light it becomes a pile of sundry facts, some of them interesting or  curious but making no meaningful picture as a whole.'' Theodosius Dobzhansky

പെണ്‍കുട്ടികള്‍ക്ക് പ്രായപൂര്‍ത്തിയാകുന്നതോടെ സമപ്രായക്കാരായ ആണ്‍കുട്ടികളേക്കാള്‍ നിറം കൂടും.പെണ്‍കുട്ടികള്‍ക്ക് അവരുടെ യൌവ്വന കാലത്തായിരിക്കും ഏറ്റവും നിറം.പ്രത്യേകിച്ച് കൊഴുപ്പ്  കൂടുതലുള്ള സ്തങ്ങള്‍ ,അരകെട്ട്, തുടകള്‍ മുതലായവ. പ്രായമാകും തോറും അല്ലെങ്കില്‍ കൂടുതല്‍ പ്രസവങ്ങള്‍ കഴിയും തോറും സ്ത്രീകളുടെ നിറം കുറയുന്നതായും കണ്ടിട്ടുണ്ട്.ഈ  പ്രത്യേകതകള്‍ക്കൊക്കെയും ഒരു വിശദീകരണം വേണ്ടെ? നമുക്ക് ചുരുങ്ങിയത് മൂന്നു ഹൈപ്പോത്തസിസുകളെങ്കിലും നമുക്ക് മുന്നോട്ടു വയ്ക്കാം.

(1) ശിശു അനുകരണം(Infantile mimicry): ജനിക്കുമ്പോള്‍ എല്ലാ കുട്ടികളും താരതമ്യേന വെളുത്തവരായിരിക്കും എന്നത് ഡാര്‍വിന്‍ മുതല്‍ ഇങ്ങോട്ട് പലരും നിരീക്ഷിച്ചിട്ടുള്ളതാണ്. കുട്ടിത്തം  തോന്നിക്കുന്ന എല്ലാ സ്വഭാവിശേഷങ്ങളും അവരോടുള്ള  അഗ്രഷന്‍  കുറയ്ക്കും എന്ന് ആധുനിക പെരുമാറ്റശാസ്‌ത്രത്തിലെ (Ethology) പ്രധാനികളിലൊരാളായ  കോണ്‍റാഡ് ലോറന്‍സ്(Nobel  prize-1973) ആദ്യമായി ചൂണ്ടിക്കാട്ടിയത് ഞാന്‍ പണ്ട് മറ്റൊരു പോസ്റ്റില്‍ വിവരിച്ചിരുന്നു.ശിശു ലക്ഷണങ്ങളോട് മനുഷ്യര്‍ വളരെ സോഫ്റ്റായും സ്നേഹത്തോടെയും പെരുമാറുന്നു.ശിശു ലക്ഷണങ്ങളെ  'helpless', 'cute', 'in need of care', 'non threatening എന്നൊക്കെയാണ് ലോകമെമ്പാടുമുള്ള എല്ലാ മനുഷ്യ സമൂഹങ്ങളും കണക്കാക്കുന്നത്. ഒന്നാലോചിച്ചാല്‍ അതില്‍ അത്ഭുതമില്ല.മുതിര്‍ന്നവരുടെ  സഹായമില്ലാതെ കുട്ടികള്‍ക്ക് ജീവിക്കാനാവില്ല എന്നതുകൊണ്ട് മുതിര്‍ന്നവരുടെ വികാരങ്ങളെ സ്വാധീനിക്കാന്‍ കഴിഞ്ഞവരുടെ പിന്‍മുറക്കാരാണ് നമ്മളെല്ലാം.Being cute was a life-or-death matter  for a baby.We are all descendants of such cute creatures.

പ്രായമായാല്‍ പോലും കുട്ടിത്തത്തിന്റെ ലക്ഷണങ്ങളായ ചുറ്റുപാടുകളോടുള്ള നമ്മുടെ ജിജ്ഞാസ,കളിക്കാനുള്ള താല്പര്യം ഒക്കെ തുടര്‍ന്നും നിലനിര്‍ത്തുന്നത് ഒരുപക്ഷേ മനുഷ്യന്റെ മാത്രം  പ്രത്യേകതയാണ്. കലകളോട്,കണ്ടുപിടുത്തങ്ങളോട്,ശാസ്ത്രത്തോട് ഒക്കെയുള്ള മനുഷ്യന്റെ പ്രതിപത്തിക്ക് കാരണവും ഈ ശിശുസ്വഭാവം നിലനിര്‍ത്തുന്നതാകാം. മനുഷ്യവംശം മൊത്തത്തില്‍ നമ്മുടെ പ്രിമേറ്റ് പൂര്‍വികരേക്കാള്‍ കൂടുതല്‍ ശിശുലക്ഷണങ്ങള്‍ കാണിക്കുന്നുണ്ട് (Modern adult humans actually look more like babies than our ape like ancestors did.Just compare ancestor  fossil skulls with modern humans.) എങ്കിലും പുരുഷന്മാര്‍ പൊതുവേ ശാരീരികമായ ശിശുത്തം ഉപേക്ഷിച്ച് പെരുമാറ്റപരമായ ശിശുത്തം നിലനിര്‍ത്തുമ്പോള്‍ സ്ത്രീകള്‍ താരതമ്യേന  പെരുമാറ്റപരമായ ശിശുത്തം ഉപേക്ഷിച്ചു ശാരീരികമായ ശിശുത്തം നിലനിര്‍ത്തുന്നു. അതായത് ശിശുക്കളോടുള്ള രൂപസാദൃശ്യം പുരുഷന്മാരേക്കാള്‍ കൂടുതല്‍ നിലനിര്‍ത്തുന്നത് സ്ത്രീകളാണ്.  സ്ത്രീസൌന്ദര്യത്തിന്റെ പാരമ്യം എന്നു പറയുന്നത് രൂപം കൊണ്ട് കുട്ടിത്തമുള്ള എന്നാല്‍ ഒരു കുട്ടിയായി തെറ്റിദ്ധരിക്കാത്ത അവസ്ഥയെയാണ്.

 അന്ത്രോപ്പോളജിസ്റ്റായ Napoleon Chagnon ആമസോണിലെ യാനോമാനോ ഇന്ത്യക്കാരോട് അവരുടെ  സ്വപ്നസുന്ദരികളേക്കുറിച്ചു  ചോദിച്ചപ്പോള്‍ അവരുടെ മറുപടി "Females who are rrwko  dude."എന്നായിരുന്നത്രെ.'Rrwko' എന്നാല്‍ പഴങ്ങളേക്കുറിച്ചു പറയുമ്പോള്‍ ഒട്ടും കൂടുതലോ കുറവോ അല്ലാതെ പാകത്തിന് പഴുത്തത് എന്നും ഏതെങ്കിലും പെണ്‍കുട്ടിയെക്കുറിച്ചാണെങ്കില്‍  പ്രായപൂര്‍ത്തിയായി അധികമായിട്ടില്ലാത്ത ‍ഒരു പതിനഞ്ച് പതിനെട്ട് വയസ്സ് പ്രായമുള്ള 'തൊട്ടാല്‍ പൊട്ടുന്ന' പ്രായമുള്ളവള്‍ എന്നര്‍ത്ഥം.നമ്മുടെ ഭാഷയില്‍ പറഞ്ഞാല്‍ മധുരപ്പതിനേഴ്.'യൗവനം  വന്നുദിച്ചിട്ടും ചെറുതായില്ല ചെറുപ്പം'എന്ന് ഉണ്ണായി വാര്യര്‍ നളചരിതത്തില്‍ പറയുന്ന ആ അവസ്ഥ. നമ്മുടെ സിനിമകളിലെ നായികമാരുടെ ശരാശരി പ്രായവും ഇതുതന്നെയാണ് എന്നത്  ശ്രദ്ധിച്ചിട്ടുണ്ടോ?നമ്മുടെ ഫാന്റസികളില്‍ എപ്പോഴും മധുരപ്പതിനേഴോ ഒരുപക്ഷേ അതിനേക്കാള്‍ കുറവോ തന്നെയാണ് ശരിയായ പ്രായം.ലോകത്ത് എല്ലായിടത്തും പുരുഷന്മാര്‍ക്ക് ഇക്കാര്യത്തില്‍  ഒരേ അഭിപ്രായം തന്നെയാണ്,അത് യാനോമാനോ ആയാലും മലയാളിയായാലും.:-) മേലെപ്പറമ്പില്‍ ആണ്‍വീട് എന്ന ചിത്രത്തില്‍ ചേട്ടാനിയന്മാര്‍ പച്ചത്തക്കാളിയും പഴുത്ത തക്കാളിയും പറഞ്ഞു  വഴക്കിടുന്നത് ഓര്‍മ്മയില്ലെ?

(ഓ:ടി:കാഴ്ചയില്‍ ശിശുത്തം നിലനിര്‍ത്തുന്ന യുവതികളോട് തോന്നേണ്ട ആ ആകര്‍ഷണം ചിലര്‍ക്ക് പ്രായം കൊണ്ട് ശിശുക്കളായവരോടും തോന്നുന്നതായിരിക്കാം പീഡോഫീലിയയുടെ കാരണം. ഞാന്‍ പീഡോഫീലിയയെ ശാസ്ത്രം ഉപയോഗിച്ച് ന്യായീകരിക്കുന്നു എന്ന വാദവുമായി 'ബുദ്ധിജീവി' കളിയ്ക്കാന്‍ വരുന്നവരോട്..... വിശദീകരണവും ന്യായീകരണവും രണ്ടും രണ്ടാണ്.അത്  തമ്മിലുള്ള വ്യത്യാസം മനസ്സിലാക്കാന്‍ ശ്രമിക്കുക.This is a description of a possible mechanism or at the most an explanation and not JUSTIFICATION.)

കുട്ടിത്തത്തിന്റെ ലക്ഷണങ്ങള്‍ (neoteny) പിന്നീടും നിലനിര്‍ത്താന്‍ കഴിഞ്ഞ സ്ത്രീകള്‍ക്ക് ഇണയുടെ സംരക്ഷണം കൂടുതല്‍ കിട്ടാന്‍ സാധ്യതയുണ്ട്.It is possible that the bond is stronger and  longer-lasting if adult female could retain some infant traits.അത്തരം ദമ്പതികളുടെ കുട്ടികള്‍ കൂടുതല്‍ ജീവിക്കാനും കൂടുതല്‍ പിന്‍ഗാമികളെ ഉണ്ടാക്കാനും അതുവഴി ഈ 'സ്വഭാവവിശേഷത്തിന്റെ  ജീനുകള്‍ ' ജീന്‍ പൂളില്‍ പടരാനും കാരണമാകാം.It is possible we selected ourselves cuteness by positive assortative mating.(positive assortative mating = mating to those who are similar to  us,i.e like attracted to like.) മറ്റു കുട്ടിത്ത ലക്ഷണങ്ങള്‍ തിരഞ്ഞെടുക്കപ്പെട്ടതിന്റെ കൂട്ടത്തില്‍ വെളുപ്പുനിറവും തിരഞ്ഞെടുക്കപ്പെട്ടിരിക്കാം.

(2) ഹോര്‍മോണ്‍ പാര്‍ശ്വഫലം (Hormonal side effect):തൊലിയിലെ പിഗ്മെന്റ്റ്‌ കോശങ്ങളും സ്ത്രീ ഹോര്‍മോണുകളും തമ്മിലുള്ള പ്രതിപ്രവര്‍ത്തനം മൂലം സ്ത്രീകളില്‍ മെലനോസൈറ്റുകള്‍ക്ക്  കുറവുണ്ടാകുന്നു.പെണ്‍കുട്ടികള്‍ പ്രായപൂര്‍ത്തിയാകുന്നതോടെയാണ് അവര്‍ക്ക് നിറം കൂടുന്നത് എന്നത് ശ്രദ്ധിക്കുക.മാത്രമല്ല ഗര്‍ഭിണിയാകുന്നതോടെ നിറം കുറയുകയും,കൂടുതല്‍ തവണ  ഗര്‍ഭിണിയാകുന്നതോടെ ആ ഇരുണ്ട നിറം സ്ഥിരമാകുകയും ചെയ്യും.അപ്പോള്‍ വെളുപ്പുനിറം വെറും ഹോര്‍മോണ്‍ പാര്‍ശ്വഫലം മാത്രമാകാം.സ്ത്രീ ഹോര്‍മോണുകള്‍ തിരഞ്ഞെടുക്കപ്പെട്ടപ്പോള്‍  പ്രത്യേകിച്ച് ഗുണഫലങ്ങളൊമൊന്നുമില്ലെങ്കിലും കൂടെപ്പോന്നതായിരിക്കാം തൊലിയുടെ വെളുപ്പുനിറവും.ഉദാഹരണത്തിന്,ഹിമോഗ്ളോബിന് ചുവപ്പുനിറമുണ്ടായത് അതിജീവനത്തിന് ആ ചുവപ്പുനിറം  ഏതെങ്കിലും തരത്തില്‍ സഹായിക്കുന്നതുകൊണ്ടല്ല,മറിച്ച് ഓക്സിജന്‍ കോശങ്ങളിലെത്തിക്കുക എന്ന ഗുണം തിരഞ്ഞെടുക്കപ്പെട്ടപ്പോള്‍ ആ പ്രത്യേക പ്രോട്ടീനിന്റെ പ്രകാശ പ്രതിഫലന സ്വഭാവവും  (അതിനെയാണല്ലോ നിറം എന്ന് പറയുന്നത്.) കൂടെ പോന്നപോലെ.അതായത് ഒരു 'spandrel.'(Spandrel നമ്മള്‍ മുന്‍പ് പരിചയപ്പെട്ടിട്ടുണ്ട്. അത് വിശ്വാസത്തിന്റെ ശാസ്ത്രം ചര്‍ച്ച ചെയ്യുന്നിടത്ത്  വിവരിച്ചിരുന്നു.)

(3) വിറ്റാമിന്‍ ഡി ഉല്പാദനം.(Means to prevent vitamin-D deficiency): ഗര്‍ഭകാലത്തും മുലയൂട്ടലിനും കൂടിയ അളവില്‍ ആവശ്യമായ വിറ്റാമിന്‍ ഡിയുടേയും കാല്‍ഷ്യത്തിന്റേയും ആവശ്യം നിറവേറ്റാന്‍  തക്കവണ്ണം നാച്ചുറല്‍ സെലക്ഷന്‍ പ്രവര്‍ത്തിക്കുന്നതാകാം പ്രായപൂര്‍ത്തിയാകുമ്പോള്‍ സ്ത്രീകള്‍ക്ക് കൂടുതല്‍ വെളുപ്പുനിറം.Natural selection has resulted in females having lighter skin and  increased vitamin D3 production to meet the greater calcium needs of pregnancy and lactation.വളരുന്ന പ്രായത്തില്‍ കൂടുതല്‍ വിറ്റാമിന്‍ ഡിയും കാല്‍സ്യവും വേണ്ടിവരുന്നതു കൊണ്ടാകാം  കുട്ടികള്‍ക്കും താരതമ്യേന വിളറിയ നിറം കാണുന്നത്.

''The natural man has only two primal passions, to get and beget.''-William Osler

ഈ കാരണങ്ങളിലേതെങ്കിലും ഒന്നോ അല്ലെങ്കില്‍ എല്ലാമോ ഇനി അതുമല്ലെങ്കില്‍ മറ്റെന്തെങ്കിലും കാരണം കൊണ്ടോ ഒക്കെ ആയിരിക്കാം സ്ത്രീപുരുഷന്മാര്‍ തമ്മിലുള്ള ഈ തൊലിയുടെ ഈ  നിറവ്യത്യാസത്തിന്റെ തുടക്കമെങ്കിലും പില്‍ക്കാലത്ത് ഈ വ്യതാസം ഒരേ വംശത്തിലെതന്നെ സ്ത്രീപുരുഷന്മാര്‍ക്ക് പരസ്പരം തിരിച്ചറിയാനുള്ള ഉപാധിയായി മാറിയിരിക്കാം.If it is information rich  natural selection will favor those who find ways to use it.മുന്‍പ് പറഞ്ഞിട്ടുള്ളപോലെ സ്ത്രീകളുടെ പ്രത്യുല്പാദനകാലം പരിമിതമാണ്.ഒരു പതിനഞ്ചു വയസ്സ് മുതല്‍ പരമാവധി ഒരു 45-50 വര്‍ഷം  വരെ.(from menarche to menopause.) സ്ത്രീപുരുഷന്മാര്‍ തമ്മിലുള്ള നിറവ്യത്യാസം ഏറ്റവും പ്രകടം ഈ പ്രായത്തിലുമാണ് എന്നതും ശ്രദ്ധേയമാണ്. ഉപയോഗിച്ചാലും ഇല്ലെങ്കിലും നിശ്ചിത സമയം  കഴിഞ്ഞാല്‍ ലാപ്സായിപ്പോകുന്നതാണ് സ്ത്രീകളുടെ പ്രത്യുല്പാദനകാലം എന്നതുകൊണ്ട്,ആ പ്രായപരിധിയിലുള്ള ഇണയെ കണ്ടെത്തുക എന്നത് പുരുഷന്റെയും ആ നിശ്ചിത സമയത്തിലുള്ളില്‍ ഒരു  എലിജിബിള്‍ ഇണയുടെ കണ്ണില്‍ പെടുക എന്നത് സ്ത്രീയുടെയും ആവശ്യമാണ്.നിറവ്യത്യാസത്തിന്റെ ഉത്ഭവം എങ്ങിനെയായാലും അത് മേറ്റ്‌ സെലക്ഷന് ഉപകാരപ്പെടും.

തൊലിയുടെ നിറം നാം ഇപ്പോള്‍ വംശസൂചകമായാണ് മനസ്സിലാക്കുന്നതെങ്കിലും അത് തുടങ്ങീട്ട് വളരെകുറച്ചു കാലം ആയിരിക്കാനേ സാധ്യതയുള്ളൂ.കാരണം മനുഷ്യ ചരിത്രത്തില്‍ ഭൂരിഭാഗം കാലവും  മനുഷ്യര്‍ മറ്റു വംശങ്ങളുമായി ഒരു ബന്ധവുമില്ലതെയാണ് കഴിഞ്ഞിരുന്നത്. മനുഷ്യരില്‍ തൊലിയുടെ നിറം ഒരു 'ദ്വിദീയ ലൈംഗിക ലക്ഷണമാണ്-Secondary sex characteristic.(Secondary sex  characteristic- പ്രത്യുല്‍പ്പാദന വ്യവസ്ഥയുടെ ഭാഗമല്ലാത്ത, ആണ്‍ പെണ്‍ വ്യത്യാസം. ഉദാ:ആണുങ്ങളിൽ മുഖരോമങ്ങള്‍ ,പരുപരുത്ത ശബ്ദം,വീതിയുള്ള തോളുകള്‍ പോലുള്ളവ. സ്ത്രീകളില്‍ ഉയര്‍ന്ന  മാറിടം,ഇടുങ്ങിയ അരകെട്ട് etc.)

യഥാര്‍ത്ഥത്തില്‍ ഈ ദ്വിദീയ ലൈംഗിക ലക്ഷണങ്ങളുടെ അവശ്യം തന്നെ ഇണയാക്കാന്‍ സാധ്യതയുള്ളവരെ വളരെ പെട്ടെന്ന് തിരിച്ചറിയുക എന്നതാണ്.ഇണയെ  തിരിച്ചറിയാന്‍ ജന്മവാസനയില്ലാത്ത ഒരു ജീവിയും ലോകത്ത് നിലനില്‍ക്കില്ല.എതിര്‍ലിംഗത്തിലുള്ള സ്വന്തം സ്പീഷീസിനെ കണ്ടാല്‍ തിരിച്ചറിയാന്‍ പ്രത്യേകം ശീലിക്കേണ്ട ഏതു ജീവിയും പരിണാമപരമായി പരാജയമായിരിക്കും.നമ്മുടെ ഋശ്യശൃംഗന്റെ കഥയിലെപോലെ ഒരിക്കലും സ്ത്രീകളെ കണ്ടിട്ടില്ലെങ്കിലും ആരുംതന്നെ ഒരു സ്ത്രീയെ മറ്റൊരു പുരുഷനായി തെറ്റിദ്ധരിക്കില്ല.

പെണ്‍കുട്ടികള്‍ പ്രായപൂര്‍ത്തിയാകുന്നതോടെ അവരുടെ നിറം കൂടുകയും യൌവ്വനകാലത്തുടനീളം ആ നിറം നിലനിര്‍ത്തുകയും ചെയ്യും എന്ന് പറഞ്ഞല്ലോ. പ്രായമാകും തോറും അല്ലെങ്കില്‍ കൂടുതല്‍  പ്രസവങ്ങള്‍ കഴിയും തോറും ഈ നിറം കുറയും ചെയ്യും എന്നതുകൊണ്ട് ഒരു സമൂഹത്തില്‍ അവിടത്തെ ശരാശരിയില്‍ കൂടുതല്‍ നിറമുള്ള ഒരു അംഗം എന്നതില്‍നിന്നും പല കാര്യങ്ങളും  ഊഹിക്കാം.എതിര്‍ ലിംഗത്തില്‍ പെട്ട, ഇപ്പേള്‍ ഗര്‍ഭിണിയല്ലാത്ത,എന്നാല്‍ ഗര്‍ഭിണിയാക്കപ്പെടാവുന്ന ഏജ് ഗ്രൂപ്പിലുള്ള,ഒരു മധുരപ്പതിനേഴുകാരിയാകാന്‍ സാധ്യത കൂടുതലാണെന്നര്‍ത്ഥം.Or at least  so our brain software or heuristic assumes.(Heuristic- a simple,fast,and often inaccurate procedure that helps find adequate,but often imperfect answer to difficult questions.The word has  same root as 'eureka'.So heuristic is an immediate nonthinking answer.)

അത്തരമൊരു കണക്കുക്കൂട്ടല്‍ നടത്തുന്ന ഒരു ബ്രെയിന്‍ അല്‍ഗോരിതം പരിണാമത്തിലൂടെ നിലവില്‍ വരാം.സെക്ഷ്വല്‍ സെലക്ഷന്‍ വഴി അത് വ്യാപിച്ചിരിക്കാം.(Sexual selection is what happens  when one of the sexes of a species evolve to prefer certain traits of opposite sex for no good reason or even when it positively hinders survival.One common example is peacock's  tail.There is absolutely no reason for a male peacock to have that ridiculous tail beyond the fact that the females have evolved to like that kind of tail.)

അധികാരം കൈയ്യാളുന്ന പുരുഷന് ഇണയെ/ഇണകളെ ഇഷ്ടാനുസരണം തിരഞ്ഞെടുക്കാനുള്ള അവസരം കിട്ടുന്നതുകൊണ്ട്,(the general rule throughout the animal kingdom is males fight for  mates and the winner takes all,which leaves most males mate less.) വെളുത്ത ഇണകളെ (which is proxy for good mates) അവരുടെ കുത്തകയാക്കാം.അങ്ങിനെ വെളുത്ത നിറവും വെളുത്ത  നിറത്തോടുള്ള താല്പര്യവും രണ്ടും അവരുടെ ജീന്‍ പൂളില്‍ വ്യാപിക്കുകയും ചെയ്യും.പതുക്കെ അധികാരവര്‍ഗ്ഗം ഭരിക്കപ്പെടുന്ന സാധാരണക്കാരേക്കാള്‍ വെളുത്തവരാകാം


ലോകത്ത് പലയിടത്തും  അതാതിടത്തെ ഭരണവര്‍ഗ്ഗം അവിടത്തെ ഭരിക്കപ്പെടുന്ന അടിസ്ഥാന വര്‍ഗ്ഗത്തേക്കള്‍ വെളുത്തവരായിരുന്നു(രണ്ടു കൂട്ടരും ഒരേ വംശമാണെങ്കിലും) എന്നൊരു നിരീക്ഷണത്തിനും കൂടി ഉത്തരമാകാം  ഇത്.Selection for light-skinned, more "feminine-looking" women should have induced a general reduction of pigmentation in both sexes.ജപ്പാനിലും മറ്റും അപ്പര്‍ ക്ലാസിന് അവിടുത്തെ സാധാരണക്കാരേക്കാള്‍ നിറമുള്ളതായി നിരീക്ഷിക്കപ്പെട്ടിട്ടുണ്ട്. വെളുത്തവര്‍ അവര്‍ വെളുത്തവരാണ് ആ ഒറ്റ കാരണം കൊണ്ട് ഉയര്‍ന്ന് അധികാരി  വര്‍ഗ്ഗമാവുകയായിരുന്നു എന്ന് സാധാരണ പറയപ്പെടുന്ന തിയറിയേക്കാള്‍ വിശ്വാസയോഗ്യം മറ്റു പല കാരണങ്ങള്‍കൊണ്ടും കാലങ്ങളോളം അധികാരം നിലനിര്‍ത്താന്‍ കഴിഞ്ഞവര്‍ പതുക്കെ കൂടുതല്‍  വെളുക്കുകയായിരുന്നു എന്നതാണ്.

സൌന്ദര്യത്തിന്റെ അടിസ്ഥാനത്തില്‍ താഴ്ന്ന വിഭാഗത്തിലെ പെണ്‍കുട്ടികളെ ഇണയായി സ്വീകരിക്കുന്നത് എല്ലായിടത്തും പ്രബലമാണ്.ബൈബിളും നമ്മുടെ പുരാണങ്ങളും ചരിത്രത്തിലെ  രാജാക്കന്മാരുമൊക്കെയായി ആവശ്യത്തിനു ഉദാഹരണങ്ങളുണ്ട്.(പുരാണങ്ങളും ചരിത്രവുമൊക്കെ എഴുതി പോസ്റ്റ്‌ ദീര്‍ഘിപ്പിക്കുന്നില്ല.) എന്തായാലും ഡാര്‍വിന്റെ ഈ നിരീക്ഷണം കിടക്കട്ടെ.

''Many persons are convinced, as it appears to me with justice, that our aristocracy,including under this term all wealthy families in which primogeniture has long prevailed, from having  chosen during many generations from all classes the more beautiful women as their wives, have become handsomer, according to the European standard, than the middle classes; yet  the middle classes are placed under equally favorable conditions of life for the perfect development of the body.''-Charles Darwin- Descent of Man

എന്തായാലും നമ്മള്‍ പ്രതീക്ഷിക്കുന്നപോലെ ബഹു ഭാര്യത്വം,primogeniture (മൂത്ത പുത്രനു മാത്രം എല്ലാ സ്വത്തുക്കളും അധികാരവും ലഭ്യമാകുന്ന അവസ്ഥ.) ഇവ രണ്ടും നിലനിന്ന സമൂഹങ്ങളില്‍ ഈ  നിറവ്യത്യാസം കൂടുതല്‍ പ്രകടവുമാണ്.ബഹുഭാര്യത്വവും മൂത്തപുത്രനുമാത്രം എല്ലാ അധികാരങ്ങളും, ഇവ രണ്ടും കേരളത്തിലെ നമ്പൂതിരി സമുദായത്തിലുണ്ടായിരുന്നു. കേരളത്തിലെ  നമ്പൂതിരിമാര്‍ക്കിടയില്‍ പുലയ ജീനുകള്‍ കാണപ്പെടുന്നുണ്ട് എന്ന പഠനം ബ്ലോഗില്‍ പണ്ട് 'സാവിത്രി- ചാത്തന്‍' ബന്ധങ്ങളുടെ തെളിവായി എല്ലാവരും ആഘോഷിച്ചതാണ്. ചാത്തന്‍ സാവിത്രിയെ  തേടിച്ചെന്നു എന്നതിനെക്കാള്‍ ജാതിനിയമങ്ങളൊക്കെ ഇത്ര കടുത്തതാകുന്നതിനൊക്കെ മുന്‍പേ ചാത്തന്റെ താരതമ്യേന വെളുത്ത സഹോദരിമാര്‍ സാവിത്രിമാരായി സ്ഥാനകയറ്റം നേടിയപ്പോള്‍  ചാത്തനും അവന്റെ ഇരുണ്ട നിറമുള്ള സഹോദരിമാരും അവിടെത്തന്നെ കിടന്നു എന്നതിനും സാധ്യതയുണ്ട്‌.) നൂറുകണക്കിന് വെളുത്ത സുന്ദരികളെ സ്റ്റോക്ക്‌ ചെയ്തിട്ടുള്ള ധാരാളം സമ്പത്തും  അധികാരവുമുള്ള ഒരു ഹാരം(harem) ഉടമയെ അല്ലെങ്കില്‍ നമ്മുടെ നമ്പൂതിരിമാരുടെ ബഹുഭാര്യത്വമോ നാടൊട്ടുക്കുള്ള സംബന്ധമോ ഒക്കെ സങ്കല്‍പ്പിച്ചുനോക്കുക.More white wives means more  whiter than average sons and daughters among those people.And those ruling class children have more chances of passing down those same genes than the average dark skinned person.)

(Off topic on primogeniture:മൂത്ത പുത്രന് മാത്രം സ്വത്തും അധികാരങ്ങളും കൈമാറുന്ന രീതി ലോകത്തെല്ലായിടത്തും വ്യാപകമായിരുന്നു.നമ്മുടെ മഹാഭാരത യുദ്ധം തന്നെ ഭരിക്കുന്ന രാജാവിന്റെ മൂത്ത  പുത്രനാണോ അതോ ജേഷ്ഠാനുജന്മാരുടെ മക്കളില്‍ മൂത്തവനാണോ അധികാരം ലഭിക്കേണ്ടത് എന്ന് തീരുമാനിക്കാനായിരുന്നല്ലോ.ഭീഷ്മര്‍ മൂത്ത പുത്രന്റെ അവകാശം നേരത്തെ സ്വയം വേണ്ടെന്നു വയ്ക്കുകയും ചെയ്തിരുന്നു. രാമായണത്തിന്റെയും കഥ ഇതുതന്നെ.മൂത്ത ഭാര്യയിലുള്ള പുത്രനാണോ അതോ ഫേവററ്റ് ഭാര്യയിലുള്ള പുത്രനാണോ അവകാശം കിട്ടേണ്ടത് എന്നായിരുന്നു അവിടെ  വിഷയം.ബൈബിളിലും അതിന്റെ സൂചനകളുണ്ട്. ഐസക്കിന്റെ രണ്ടാമത്തെ പുത്രന്‍ ജേക്കബ്‌ മൂത്ത പുത്രന്റെ അവകാശങ്ങള്‍ സൂത്രത്തില്‍ തട്ടിയെടുക്കുന്ന കഥ നോക്കുക.(Genesis 25:31-34) ഈ  ആചാരം പിന്‍തുടരുന്നവരില്‍ കാലക്രമത്തില്‍ അധികാരവും ധനവും കേന്ദ്രീകരിക്കുന്നത് സ്വാഭാവികമാണ്.Just common logic.ഇവിടെ നമ്പൂതിരിമാര്‍ മറ്റുള്ളവരുടെ സ്വത്തും അധികാരവും പിടിച്ചടക്കി മാത്രമാണ് വലുതായത് എന്നു പറയുന്നവര്‍ ഈ മൂത്തപുത്രന് മാത്രം അവകാശങ്ങള്‍ കിട്ടുന്ന  ആചാരത്തേയും അല്‍പ്പം കൂടി പ്രാധാന്യത്തോടെ കാണാം.(അവരുടെ സ്ത്രീധന സമ്പ്രദായവും സ്വത്തു കേന്ദ്രീകരിക്കുന്നതിനു സഹായിച്ചിരിക്കാം.) വെറും 'നമ്പൂതിരി ബാഷിംഗ്' മാത്രം കൊണ്ട് കിട്ടുന്ന  ആ പുരോഗനവാദി ഇമേജ് കിട്ടില്ല എന്നാലും...)
---------------------------------------------------------------------------------------

''എങ്ങുനിന്നെങ്ങു നിന്നീ കവിള്‍ തട്ടിലീ..
കുങ്കുമ വര്‍ണ്ണം പകര്‍ന്നൂ..
മാതളപ്പൂക്കളില്‍ നിന്നോ
മലര്‍വാക തളിര്‍ത്തതില്‍ നിന്നോ
പാടിപ്പറന്നു പോം എന്‍
കിളിതത്ത തന്‍ പാടലമാം ചുണ്ടില്‍ നിന്നോ..''

പിന്നൊന്നുള്ളത് blushing എന്ന പ്രതിഭാസമാണ്.അതൊരു മിസ്റ്ററിയാണ്. എന്തുകൊണ്ട് നാണം വരുമ്പോള്‍ കവിളുകള്‍ ചുവക്കുന്നു?പ്രത്യേകിച്ച് പുരുഷന്മാരേക്കാള്‍ കൂടുതലായി  കുട്ടികളുടെയും സ്ത്രീകളുടെയും? പ്രായമാകുംതോറും ഈ വികാരക്ഷോഭം/നാണം കൊണ്ടുള്ള ചുവക്കല്‍ കുറയുന്നതെന്തുകൊണ്ട്?ഡാര്‍വിന്‍ ഈ കാര്യങ്ങള്‍ ചര്‍ച്ച ചെയ്യുന്നുണ്ട്. (I have said it  before,and I will say it again.That man Darwin was a real genius.Iam always impressed by the observations he made all that time back.Read his books.)

''BLUSHING is the most peculiar and the most human of all expressions. Monkeys redden from passion, but it would require an overwhelming amount of evidence to make us believe  that any animal could blush.The reddening of the face from a blush is due to the relaxation of the muscular coats of the small arteries, by which the capillaries become filled with blood;  and this depends on the proper vaso-motor centre being affected. No doubt if there be at the same time much mental agitation, the general circulation will be affected; but it is not due to  the action of the heart that the network of minute vessels covering the face becomes under a sense of shame gorged with blood. We can cause laughing by tickling the skin, weeping or  frowning by a blow, trembling from the fear of pain, and so forth;but we cannot cause a blush, as Dr. Burgess remarks, by any physical means,--that is by any action on the body. It is the  mind which must be affected. Blushing is not only involuntary; but the wish to restrain it, by leading to self-attention actually increases the tendency.

The young blush much more freely than the old, but not during infancy, which is remarkable, as we know that infants at a very early age redden from passion...........

Women blush much more than men. It is rare to see an old man, but not nearly so rare to see an old woman blushing. The blind do not escape.''(Charles Darwin-The expression of the  emotions in man and animals)

 ''Are they ashamed of their loathsome conduct? No, they have no shame at all; they do not even know how to blush. So they will fall among the fallen; they will be brought down when I  punish them," says the LORD.''Jeremiah 6:15

ഈ നാണം കൊണ്ട് ചുവക്കല്‍ എല്ലാ എല്ലാവരിലും കാണാമെങ്കിലും കുട്ടികളിലും സ്ത്രീകളിലും കൂടുതല്‍ പ്രകടമാണ്. ജന്മനാ അന്ധന്മാര്‍ പോലും ചുവക്കുന്നുണ്ടെന്ന് ഡാര്‍വിന്‍ പറയുന്നു. അപ്പോള്‍  അത് മറ്റുള്ളവരെ കണ്ടു പഠിക്കുന്നതാകാന്‍ വഴിയില്ല.യുവതികളുടെ blushing കുട്ടിത്തത്തിന്റെ ലക്ഷണങ്ങള്‍ പിന്നീടും നിലനിര്‍ത്തുന്ന neoteny യുടെ മറ്റൊരു ഉദാഹരണമാകാം. ഒരുപക്ഷേ ഈ  ബ്ലഷിംഗ് വെളുത്ത സുന്ദരികളില്‍ കൂടുതല്‍ പ്രകടവുമാകാം.''പിന്നെ തണ്ടൊടിഞ്ഞ താമര ഞാന്‍ കൊണ്ടു വന്നപ്പോള്‍.. പെണ്ണേ നിന്‍കവിളില്‍ കണ്ടു മറ്റൊരു താമരക്കാട്.'' എന്നോ,''കാശ്മീരസന്ധ്യയിലെ സിന്ദൂരത്താഴ്വരകള്‍ കണ്ണുകള്‍ക്കു കാവല്‍നില്‍ക്കും കവിളിണകള്‍''എന്നോ ഒക്കെ ഒരു വെളുത്ത  സുന്ദരിയെ നോക്കിയേ പാടാന്‍ പറ്റൂ.:-)

ചുരുക്കത്തില്‍ വെളുപ്പ് നിറം കറുപ്പുനിറത്തേക്കാള്‍ കൂടുതല്‍ information rich ആണെന്നു പറയാം. കറുത്തവന്‍ അവന്റെ നിറത്തേക്കുറിച്ചെഴുതിയ പ്രസിദ്ധമായ ആ കവിതയിലും അത്  സൂചിപ്പിക്കുന്നുണ്ട്.

When I was born, I was black.
When I grew up, I was black.
When I get hot, I am black.
When I get cold, I am black.
When I am sick, I am black.
When I die, I am black.

When you were born, You were pink.
When you grew up, You were white.
When you get hot, You go red.
When you get cold, You go blue.
When you are sick, You go purple.
When you die, You go green.
And yet you have the cheek to call me coloured!! (The children's book of poems, prayers and meditations ed. Liz Attenborough)

'ചര്‍മ്മം കണ്ടാല്‍ പ്രായം തോന്നുകയേ ഇല്ല' എന്ന പരസ്യ വാചകം ഓര്‍മ്മയില്ലെ? പ്രായമാകുംതോറും തൊലിയില്‍ അടയാളങ്ങള്‍ വന്നു തുടങ്ങും(age spots). തൊലിയിലുണ്ടാകുന്ന പല  വ്യതിയാനങ്ങള്‍ക്കും (Dermatoses-physiologic and pathologic changes that occour on tha skin nails and hair shaft.) പുരുഷ ഹോര്‍മോണായ  ആന്ഡ്രോജനുമായി ബന്ധമുണ്ട്.ഈ ഹോര്‍മോണ്‍  തകരാറുകള്‍ ഗര്‍ഭധാരണ സാധ്യതയെ ബാധിച്ചേക്കാം.Any cues to ill health or older age are seen as less attractive. ഇതൊക്കെ വെളുത്ത തൊലിയിലാണ് കൂടുതല്‍ വ്യക്തമാകുക എന്നൊരു  ഹൈപ്പോത്തെസിസ്സും മുന്നോട്ടു വയ്ക്കാം.

നല്ല വെളുത്ത 'no marks' ചര്‍മ്മത്തോടുള്ള താല്പര്യം കുത്തക കമ്പനികളുടെ സൃഷ്ടിയല്ല.('മുഖക്കുരു മുളക്കുന്ന കവിളിലെ കസ്തൂരി നഖക്ഷതം കൊണ്ടു ഞാന്‍ കവര്‍ന്നെടുക്കും' എന്നൊക്കെ പാട്ടിലേ   കാണൂ.യഥാര്‍ത്ഥ ജീവിതത്തില്‍ ആര്‍ക്കും കുണ്ടും കുഴിയുമുള്ള മുഖത്തോട് താല്പര്യമുണ്ടാകില്ല.:-)) Absence of sores and lesions, are universally regarded as attractive.നമ്മുടെ സഹജമായ ഇഷ്ടം  കുത്തക കമ്പനികള്‍ മുതലാക്കുന്നു എന്നേയുള്ളൂ.നല്ല സ്മൂത്തായ വെളുത്ത ചര്‍മ്മത്തോടുള്ള താല്പര്യം ലോകവ്യാപകമാണ് എന്ന് കഴിഞ്ഞ പോസ്റ്റില്‍ കണ്ടതാണ്.(കറുത്ത സുന്ദരികളുണ്ടോ?)

നമ്മുടെ  ബുദ്ധിജീവികള്‍ എത്ര കണ്ണടച്ചാലും ലോകത്തെല്ലായിടത്തും പരമ്പരാഗതമായി തൊലിവെളുപ്പിക്കല്‍ ലേപനങ്ങളും മറ്റുമുണ്ട്. സായിപ്പിന്റെ സ്വാധീനമൊക്കെ വരുന്നതിനു മുന്‍പുതന്നെ.ഇപ്പോഴുള്ള വര്‍ണ്ണ  വിവേചനമൊക്കെ പില്‍കാലത്ത്,പല വര്‍ണ്ണങ്ങളിലുള്ള ആളുകള്‍ പരസ്പരം കണ്ടുമുട്ടാനും കൂടിക്കലരാനും തുടങ്ങിയതിനു ശേഷം സംഭവിച്ചതാകാം.We are innately sensitive to differences in skin  color, but this sensitivity probably didn'’t evolve in response to ethnic differences.It evolved to identify much smaller gender and age differences (van den Berghe & Frost,1986)  സ്വാഭാവികമായി ഇരുണ്ട നിറമുള്ള ഇണകളെ പോലും 'not with in the proper age group' എന്ന് ബ്രെയിന്‍ അല്‍ഗോരിതം തീരുമാനിക്കുന്നതാകാം വെളുത്ത തൊലിയോടുള്ള നമ്മുടെ ഇഷ്ടത്തിനും  കറുത്ത തോലിയോടുള്ള അനിഷ്ടത്തിനും കാരണം.അമേരിക്കയിലെ മിശ്രവര്‍ഗ്ഗ വിവാഹങ്ങളില്‍ (inter racial marriages) ഭൂരിഭാഗവും കറുത്ത പുരുഷനും വെളുത്ത സ്ത്രീയും തമ്മിലാണെന്ന കഴിഞ്ഞ  പോസ്റ്റില്‍ സൂചിപ്പിച്ചിരുന്നു.ഒരു വെളുത്ത പുരുഷന്‍ കറുത്ത വര്‍ഗ്ഗക്കാരിയെ വിവാഹം കഴിക്കുന്നത് താരതമ്യേന അപൂര്‍വ്വമാണ്.സാധാരണ രീതിയില്‍ രണ്ടും തമ്മില്‍ വ്യത്യാസമുണ്ടാകേണ്ടതില്ല.ഈ  തുല്യതയില്ലായ്മ എങ്ങിനെ വിശദീകരിക്കും?
------------------------------------------------------------------------------------------------------------


നിറത്തിലെ സ്ത്രീപുരുഷ വ്യത്യാസത്തില്‍നിന്ന് സ്വാഭാവികമായി എത്താവുന്ന ഒരു നിഗമനം സ്ത്രീയുടെ മുഖത്തിന് പുരുഷന്മാരേക്കാള്‍ കോണ്ട്രാസ്റ്റ് കൂടുതലായിരിക്കും എന്നാണ്.കൂടിയ  കോണ്ട്രാസ്റ്റ് എന്നാല്‍ കണ്ണുകളും ചുണ്ടുകളും വിളറിയ നിറമുള്ള മുഖത്തിന്റെ പശ്ചാത്തലത്തില്‍ കൂടുതല്‍ എടുത്തുകാണിക്കും എന്നര്‍ത്ഥം.ഈ ചിത്രങ്ങള്‍ നോക്കുക.ഇതില്‍ കൂടുതല്‍ സ്ത്രൈണത  തോന്നിപ്പിക്കുന്ന മുഖം ഏത്? കുറവ് സ്ത്രൈണത അഥവാ പൌരുഷം തോന്നിപ്പിക്കുന്ന മുഖം ഏത്?2009ല്‍ ഏറ്റവും നല്ല ഇല്യൂഷനുകളിലൊന്നായി തിരഞ്ഞെടുക്കപ്പെട്ടതാണ് 'Illusion of sex' എന്ന  ഈ ചിത്രം.Picture by Richard Russell (Harvard University)

മിക്കവാറും ആര്‍ക്കും തെറ്റാന്‍ സാധ്യതയില്ലെന്നാണ് തോന്നുന്നത്.രണ്ടു ചിത്രങ്ങളും സത്യത്തില്‍ ഒന്നു തന്നെയാണ്.അനേകം സ്ത്രീപുരുഷന്മാരുടെ ചിത്രങ്ങള്‍ മോര്‍ഫ് ചെയ്തുണ്ടാക്കിയ ഒരു 'ആണും  പെണ്ണും കെട്ട'(androgynous) ചിത്രമാണ് ഇവിടെ കാണുന്നത്.അതായത് വ്യക്തമായ സ്ത്രൈണതയോ പൌരുഷമോ തോന്നിപ്പിക്കാത്ത ഒരു ന്യൂട്രല്‍ ചിത്രം.രണ്ടും തമ്മിലുള്ള ഏക വ്യത്യാസം  ചിത്രങ്ങളുടെ കോണ്ട്രാസ്റ്റ് മാത്രമാണ്.രണ്ടാമത്തെ ചിത്രത്തില്‍ തൊലി അല്‍പ്പം ലൈറ്റാക്കിയിട്ടുണ്ട്.അതുമൂലം കണ്ണുകള്‍ക്കും ചുണ്ടിനും കൂടുതല്‍ കോണ്ട്രാസ്റ്റ് തോന്നിപ്പിക്കുന്നു. ഇത്ര ചെറിയ വ്യത്യാസം  കൊണ്ട്  ഇത്ര വലിയ മാറ്റം തോന്നിപ്പിക്കുമോ എന്നത് പലര്‍ക്കും അവിശ്വസനീയമായിത്തോന്നാം.(പന്ത്രണ്ടു വയസ്സുള്ള എന്റെ മകള്‍ പോലും ഒറ്റനോട്ടത്തില്‍ ആണേത് പെണ്ണേത് എന്ന് പറഞ്ഞു.  പക്ഷേ രണ്ടും ഒരു ഫോട്ടോ തന്നെയാണ് എന്നത് വിശ്വസിക്കാന്‍ കൂട്ടക്കിയില്ല‍.അവള്‍ക്ക് അത്ര ഉറപ്പാണ്‌ രണ്ടും രണ്ടു ചിത്രമാണെന്ന്.)


തൊലിയുടെ ലൂമിനോസിറ്റി (പ്രതിഫലനക്ഷമത-എത്രമാത്രം വെളിച്ചം പ്രതിഫലിപ്പിക്കുന്നു എന്നത്- the more light gets reflected more lighter the face.) മാറ്റാതെ തന്നെ കണ്ണുകളും ചുണ്ടും അല്‍പ്പം  കടുപ്പിച്ചാലും ഇതേ എഫ്ഫക്റ്റ്‌ ഉണ്ടാകും.അതായത് കണ്ണുകളുടെയും ചുണ്ടുകളുടെയും ലൂമിനോസിറ്റി കുറച്ചു കൊണ്ടും കൊണ്ട്രസ്റ്റ്‌ കൂട്ടാം. ചിത്രം നോക്കുക.ഇവിടെ തൊലിയെ അതേപടി നിലനിര്‍ത്തി  കണ്ണുകളും ചുണ്ടും കടുപ്പിക്കുകയാണ് ചെയ്തിരിക്കുന്നത്‌.മുന്‍ ചിത്രത്തിലുള്ള അതെ എഫ്ഫക്റ്റ്‌ തന്നെയാണ് ഇവിടെയും. കോണ്ട്രാസ്റ്റ് കൂടിയത് സ്ത്രൈണതയുള്ള മുഖം.മറ്റേത് കൂടുതല്‍  പൌരുഷമുള്ളത്. തൊലിയുടെ വെളുപ്പല്ല മറിച്ച് മുഖത്തിന്റെ ലൂമിനോസിറ്റി കൊണ്ട്രാസ്റ്റാണ് ഈ ഇല്ല്യൂഷന്‍ ഉണ്ടാക്കുന്നത്.തൊലിയുടെ നിറം മാത്രമല്ല മുഖത്തിന്റെ കോണ്ട്രാസ്റ്റാണ് മുഖത്തിന്റെ  ഐഡന്റിറ്റി അതായത് gender തിരിച്ചറിയാന്‍ ഉപയോഗിക്കുന്നത് എന്നതാണ് ഇതില്‍നിന്നു മനസ്സിലാക്കാനാകുന്നത്.We use the absolute luminosity of the skin and the contrast between this  skin luminosity and that of the lips and the eyes to identify gender.Off course we may not be consciously aware of the sex difference in facial contrast,but it seems we still use it as a cue  in perceiving the sex of a face.

അപ്പോള്‍ പറഞ്ഞുവരുന്നത്, കൊണ്ട്രാസ്റ്റ്‌ കൂടിയ മുഖം കൂടുതല്‍ സ്ത്രൈണതയുള്ളതായി തോന്നിക്കും. സ്ത്രീകളുടെ തൊലിക്ക് സ്വാഭാവികമായിത്തന്നെ പ്രതിഫലനക്ഷമത കൂടുതലാണ് എന്ന് ചില  പഠനങ്ങള്‍ കാണിക്കുന്നു.If the facial contrast (both relative lightness of facial skin and the relative contrast between facial color and eye/lip color.) is used as a cue for perceiving the sex  of a face, it would not be surprising if it were also used for mate selection.മറ്റൊരു തരത്തില്‍ പറഞ്ഞാല്‍ സ്ത്രീയുടെ ലക്ഷണം കൊണ്ട്രസ്റ്റ്‌ കൂടിയ മുഖവും പുരുഷന്റേത് കൊണ്ട്രസ്റ്റ്‌ കുറഞ്ഞ  മുഖവും എന്നാവാം. തൊലിയുടെ നിറം ഒരു 'ദ്വിദീയ ലൈംഗിക സൂചക'മാണ് (Secondary sexual characteristic) എന്ന് നാം കണ്ടതാണ്. Secondary sexual characteristic helps women to stand out  in the crowd.They wanted to catch a man's eye.Same for men also.
-----------------------------------------------------------------------------------------------

''A woman gets thirty percent of her beauty from nature and seventy percent from makeup.''-Chinese Proverb

ഇനി നമുക്ക് വെളുത്ത പൌഡറിലേക്ക് (കറുത്ത പൌഡറല്ല:-)) അഥവാ മേയ്ക്കപ്പ് എന്ന കലയിലേക്ക് വരാം.സ്ത്രീകള്‍ കണ്ണെഴുതുന്നതിന്റേയും പൌഡറിടുന്നതിന്റേയും ലിപ്സ്റ്റിക്ക്  ഉപയോഗിക്കുന്നതിന്റേയും പുറകിലുള്ള കാരണം പിടി കിട്ടിയോ ആര്‍ക്കെങ്കിലും?ഏറ്റവും സാധാരണമായ സൌന്ദര്യവര്‍ദ്ധനോപാധികള്‍ ഇവ മൂന്നുമാണല്ലോ.Female cosmetics can be viewed as a  way of manipulating facial attractiveness by exaggerating the luminosity contrast.മേയ്ക്കപ്പോടു കൂടിയതും അല്ലാത്തതുമായ ഒരു ഫോട്ടോ കണ്ടാല്‍ ആര്‍ക്കും മനസ്സിലാക്കാവുന്ന കാര്യമേ  ഉള്ളൂ.ഫ്രഞ്ച് മാസികയായ Elle രണ്ടായിരത്തി ഒന്‍പതില്‍ 'Stars Sans Fards' (which means stars 'without rouge/makeup') എന്ന പേരില്‍ മേയ്ക്കപ്പില്ലാത്ത സെലെബ്രെറ്റികളുടെ കവര്‍  ചിത്രത്തോടെ പ്രസിദ്ധീകരിച്ചിരുന്നു.അത്തരത്തില്‍ പ്രസിദ്ധീകരിച്ച പ്രശസ്ത മോഡലായ മോണിക്ക ബെലൂച്ചിയുടെ കവര്‍ ചിത്രവും അവര്‍ ഒരു പൊതു പരിപാടിയില്‍ പങ്കെടുക്കുന്ന  മേയ്ക്കപ്പോടുകൂടിയ ചിത്രവും നോക്കൂ.കവര്‍ ചിത്രത്തിലെ മേയ്ക്കപ്പില്ലാത്ത മുഖത്തിന്റെ കോണ്ട്രാസ്റ്റ് ഇല്ലായ്മ തന്നെയാണ് പെട്ടെന്ന് ശ്രദ്ധയില്‍ പെടുക.മേയ്ക്കല്ലാത്ത ചിത്രത്തിലാണ് അവര്‍  കൂടുതല്‍ വെളുത്തിരിക്കുന്നത് എന്നും ശ്രദ്ധിക്കുക.ഇത് വെറും തൊലിനിറത്തേക്കാള്‍ മുഖത്തിന്റെ കോണ്ട്രാസ്റ്റാണ് പ്രധാനം എന്ന് സൂചിപ്പിക്കുന്നു.

''നിന്റെ മിഴിയില്‍ നീലോല്പലം
നിന്നുടെ ചുണ്ടില്‍ പൊന്നശോകം
നിന്‍ കവിളിണയില്‍ കനകാംബരം''

കൊണ്ട്രാസ്റ്റ് കൂടിയ ഒരു മുഖമാണ് നമ്മുടെ ഭാസ്കരന്‍മാഷ് ഇവിടെ വര്‍ണ്ണിക്കുന്നത്. മഷിയെഴുതാതെതന്നെ നല്ലപോലെ കറുത്ത മിഴികള്‍ സൌന്ദര്യ ലക്ഷണമായി പണ്ടുമുതലേ  കണക്കാക്കുന്നുണ്ട്.കഴിഞ്ഞ പോസ്റ്റിലെ റഫറന്‍സുകളിലെല്ലാം ഇതു കാണാം.ഉദാഹരണത്തിന്, മഹാഭാരതത്തിലെ ഋഷ്യശൃംഗന്‍ താന്‍ പുതുതായി കണ്ട 'മുനികുമാരന്റെ' നിറവും കണ്ണുകളും തമ്മിലുള്ള  കൊണ്ട്രാസ്റ്റ്‌ പ്രത്യേകം എടുത്തു പറയുന്നുണ്ട്.'and he was exceedingly fair with eyes graceful and black.'(Translation by Kisari Mohan Ganguli.)

''Beauty, to me, is about being comfortable in your own skin.That, or a kick-ass red lipstick.''- Gwyneth Paltrow-American actress

ചരിത്രാതീതകാലം മുതല്‍ക്കെ എല്ലാ സമൂഹങ്ങളും സ്ത്രീകളുടെ മുഖത്തിന്റെ കോണ്ട്രാസ്റ്റ് കൂട്ടുന്ന ഈ ടെക്നോളജി സ്വതന്ത്രമായിത്തന്നെ വികസിപ്പിച്ചിട്ടുണ്ട് എന്നത്  യാദൃശ്ചികമാണോ?ബാബിലോണിലെ ഉര്‍ പട്ടണത്തില്‍നിന്ന് മൂവ്വായിരം വര്‍ഷം പഴക്കമുള്ള ലിപ്സ്റ്റിക്ക് കണ്ടെത്തിയിട്ടുണ്ട്.ഒരു പക്ഷെ ഈജിപ്തിലായിരിക്കാം കണ്‍മഷി ഉപയോഗത്തിന്റെ ഏറ്റവും  പഴയ തെളിവുകളുള്ളത്.കണ്ണുകളുടെ കൊണ്ട്രാസ്റ്റ്‌ കൂട്ടുന്ന സുറുമയും മസ്ക്കാരയും ഐഷാഡോയുമൊക്കെ ആര്‍ക്കിയോളജിസ്റ്റുകള്‍ അവിടെ കണ്ടെത്തീട്ടുണ്ട്. സുറുമയെഴുതിയ കണ്ണുകളുള്ള നെഫ്രെര്‍റ്റിറ്റി  രാജ്ഞിയുടെ (ആ വാക്കിന്റെ അര്‍ഥം തന്നെ'The beautiful woman has come' എന്നാണ്.) പ്രതിമ സുപ്രസിദ്ധമാണല്ലോ. മൂവ്വായിരം വര്‍ഷം മുന്‍പുള്ള ഒരു പാപ്പിറസ്‌ ചുരുളില്‍ (Papyrus Chester  Beatty I) കണ്മഷി ഉപയോഗിക്കുന്നതിനേക്കുറിച്ചുള്ള സൂചനകളുണ്ട്.

''My heart flutters hastily,
When I think of my love of you;
It lets me not act sensibly,
It leaps from its place.
It lets me not put on a dress,
Nor wrap my scarf around me;
I put no paint upon my eyes,
I'm even not anointed.''

ക്ലിയോപാട്ര രാജ്ഞി ചിലതരം പ്രാണികളെ അരച്ചുണ്ടാക്കുന്ന ഒരുതരം ചുവന്ന ചായം (carmine red- the word has its origin from Sanskrit 'krmi' which means worm,insect.) ചുണ്ടുകള്‍  ചുവപ്പിക്കാന്‍ ഉപയോഗിച്ചിരുന്നതായി പറയുന്നു.ക്ലിയോപാട്രയുടെ മുഖത്തെഴുത്തും വളരെ പ്രസിദ്ധമാണ്. കഴിഞ്ഞ നൂറ്റാണ്ടില്‍ എലിസബത്ത് ടെയ്‌ലര്‍ പ്രശസ്തമാക്കിയ ആ മേയ്ക്കപ്പിന് ഈ  ഈ  ഇരുപത്തൊന്നാം നൂറ്റാണ്ടിലും അനുകരണക്കാരുണ്ട്.

പഴയ നിയമത്തിലും സുന്ദരികള്‍ കണ്മഷി ഉപയോഗിച്ചിരുന്നതിന്റെ സൂചനകളുണ്ട്.

Then Jehu went to Jezreel. When Jezebel heard about it, she put on eye makeup, arranged her hair and looked out of a window. 2 Kings 9:30

What are you doing, O devastated one? Why dress yourself in scarlet and put on jewels of gold? Why shade your eyes with paint?You adorn yourself in vain.Your lovers despise you;  they seek your life.Jeremiah 4:30

They even sent messengers for men who came from far away, and when they arrived you bathed yourself for them, painted your eyes and put on your jewelry.Ezekiel 23:40

സിന്ധുനദീ തടത്തില്‍നിന്നും കണ്മഷിയും ചാന്തുമൊക്കെ കിട്ടീട്ടുണ്ട്.കണ്ണില്‍ അഞ്ജനമെഴുതുന്നത് പണ്ടുമുതലേ നമ്മുടെ ശീലവുമാണല്ലോ. കണ്ണെഴുതുന്ന ഈ സുന്ദരിയുടെ ഖജുരാഹോ ശില്പം  പതിനൊന്നാം നൂറ്റാണ്ടിലേതാണ്. കാളിദാസന്‍ കുമാരസംഭവത്തില്‍ പാര്‍വതിയുടെ ചമയം വിവരിക്കുന്ന ഭാഗത്ത് കണ്ണുകളില്‍ മഷിയെഴുതുന്നതിനേക്കുറിച്ച് പറയുന്നുണ്ട്.

തസ്യാ:സുജാതോല്പലപത്രകാന്തേ
പ്രസാധികാഭിര്‍ന്നയനേനിരീക്ഷ്യ/
ന ചക്ഷുഷോ:കാന്തിവിശേഷബുദ്ധ്യാ
കാളാഞ്ജനം മംഗളമിത്യുപാത്തം//

(താമരപ്പൂവിതള്‍ പോലത്തെ കണ്ണുകള്‍ക്ക്‌ ഭംഗി കൂട്ടാമെന്ന് കരുതീട്ടല്ല,മംഗളമാണല്ലോ എന്ന് കരുതി കണ്ണുകളില്‍ അഞ്ജനമെഴുതിച്ചു.)

വാത്സ്യായനന്റെ കാമസൂത്രത്തില്‍ മസ്ക്കാരയുണ്ടാക്കുന്ന വിധവും അതിന്റെ പ്രയോജനവും വിവരിക്കുന്നുണ്ട്.

''An ointment made of the tabernamontana corornaria, the costus specious of arabicus, and the flacourtia cataphracta, can be used as an unguent of adornment.If a fine powder is made  of the above plants, and applied to the wick of a lamp, which is made to burn with the oil of blue vitriol, the black pigment or lamp black produced therefrom, when applied to the  eyelashes, has the effect of making a person look lovely''.(Kama Sutra)

''A woman without paint is like food without salt."(Plautus-roman philosopher.)

ലോകമെമ്പാടും സ്ത്രീകളുടെ മേക്കപ്പിന്റെ തിയറി രണ്ടുമൂവായിരം വര്‍ഷമായിട്ടും ഒട്ടും മാറിയിട്ടില്ല.മുഖം വെളുപ്പിക്കുക,കണ്ണുകളും ചുണ്ടും കടുപ്പിക്കുക.ചുരുക്കത്തില്‍ കാഴ്ചയിലുള്ള ലിംഗപരമായ  വ്യത്യാസം പരമാവധി വര്‍ദ്ധപ്പിക്കുക അതാണ് മേയ്ക്കപ്പിന്റെ ധര്‍മ്മം.Cosmetics are used in precisely the right way to exaggerate sex difference, making the face appear more feminine,and  hence attractive.'സുന്ദരനാണ് വരുന്നതെങ്കില്‍ സുറുമയിത്തിരി എഴുതേണം' എന്ന സിനിമാപാട്ട് കേട്ടിട്ടില്ലെ?മേയ്ക്കപ്പുകൊണ്ട് ല്യൂമിനോസിറ്റി കൊണ്ട്രാസ്റ്റ്‌ കൂട്ടി പരമാവധി സ്ത്രൈണത വരുത്തുന്നതിന്റെ ഏറ്റവും നല്ലൊരു ഉദാഹരണം ജപ്പാനിലെ ഗൈഷകളുടെ മേയ്ക്കപ്പാണ്.നമ്മുടെ  കഥകളിയിലെ സ്ത്രീ കഥാപാത്രങ്ങളുടെ മിനുക്കുവേഷവും മറ്റൊരു നല്ല ഉദാഹരണമാണ്.(ഇത്രമാത്രം കൃത്രിമവും അസ്വാഭാവികവുമായ മേയ്ക്കപ്പ് ഒട്ടും വൃത്തികേടായി തോന്നുന്നില്ല എന്നുമാത്രമല്ല  വളരെ സ്ത്രൈണവുമായി തോന്നുന്നു എന്നത് വിശദീകരണം വേണ്ട ഒരു അത്ഭുതമായി ആര്‍ക്കും തോന്നാത്തതെന്താ?)

''When you get to the point where you cheat for the sake of beauty, you're an artist.''Max Jacob-French poet, painter

Vadim Andreev എന്നൊരു റഷ്യന്‍ മേയ്ക്കപ്പ് കലാകാരനുണ്ട്.അദ്ദേഹം തന്റെ മോഡലുകള്‍ക്ക്  മേയ്ക്കപ്പിലൂടെ വരുത്തുന്ന മാറ്റം അതിശയകരമാണ്.ഒരു സാമ്പള്‍ ഇതാ.....കൂടുതല്‍ ബിഫോര്‍  ആഫ്റ്റര്‍ ചിത്രങ്ങള്‍ക്കായി അദ്ദേഹത്തിന്റെ വെബ്‌ സൈറ്റ്.......ഇവിടെയും മുഖത്തിന്റെ കോണ്ട്രാസ്റ്റാണ് ആദ്യം ശ്രദ്ധയില്‍പ്പെടുക. അദ്ദേഹത്തിന്റെ വെബ്‌സൈറ്റില്‍ പുരുഷന്മാരുടെ മേയ്ക്കപ്പ്  സ്റ്റൈല്‍ കൂടി നോക്കുക.അവരുടെ ബിഫോര്‍ ആഫ്റ്റര്‍ ചിത്രങ്ങള്‍ ശ്രദ്ധിച്ചാലറിയാം കൊണ്ട്രസ്റ്റ്‌ കൂട്ടുന്ന ഒന്നും ആണുങ്ങളുടെ മേയ്ക്കപ്പില്‍ ചെയ്തിട്ടില്ല. ഏതൊക്കെ കുത്തക എങ്ങനൊക്കെ പരസ്യം  ചെയ്താലും മുഖത്തിന്റെ കൊണ്ട്രാസ്റ്റ് കൂട്ടുന്ന പുരുഷ സൌന്ദര്യ വസ്തുക്കള്‍ ചിലവാകില്ല.വെറും കോര്‍പ്പറേറ്റ് ആര്‍ത്തിയും പരസ്യങ്ങളുമാണ് സൌന്ദര്യവര്‍ദ്ധക വസ്തുക്കളുടെ പോപ്പുലാരിറ്റിക്കു  കാരണം എന്ന സ്ഥിരം വാദം ശരിയായിരുന്നെങ്കില്‍ ആണ്‍ ലിപ്സ്റ്റിക്കൊക്കെ കാണണമായിരുന്നു.

അതുപോലെ എന്തുകൊണ്ട് പുരുഷന്മാര്‍ മുഖം വാക്സ് ചെയ്യുന്നില്ല? ദിവസവും ഷേവ് ചെയ്യുന്ന ബുദ്ധിമുട്ട് ഒഴിവാക്കിക്കൂടെ?ഈ നാലും അഞ്ചും ബ്ളേഡുകളൊക്കെയുള്ള ഗില്ലറ്റൊക്കെ ഇപ്പോള്‍  വന്നതല്ലെ.ഇരുപതിനായിരം വര്‍ഷം മുന്‍പ് കല്ലുകൊണ്ടും കക്കകള്‍ കൊണ്ടും ഷേവു ചെയ്തിരുന്നതായി തെളിവുവുകളുണ്ട്.ഇരുമ്പു യുഗത്തിനൊക്കെ മുന്‍പ് കല്ലുകൊണ്ടും മൂര്‍ച്ച പെട്ടെന്ന് നഷ്ടപ്പെടുന്ന  ചെമ്പ്,ഓട് ഇവകൊണ്ടൊക്കെയുള്ള ഷേവിങ്ങ് കത്തികളുടെ കാര്യം കഷ്ടമായിരുന്നു.നിണം പൊടിക്കാത്ത ക്ഷൌരപ്രവീണന്മാര്‍ അക്കാലത്ത് ഒട്ടുമില്ലായിരുന്നു.പണ്ട് കഥകളി കമ്പക്കാരനായ ഒരു നമ്പൂരി പറഞ്ഞപോലെ കത്തിയും താടിയും ചേര്‍ന്നാല്‍ നിണമുണ്ടാകുന്ന അവസ്ഥ. ചുരുക്കത്തില്‍ പുരുഷന്മാരുടെ ഷേവിംഗ് ചരിത്രത്തിലെ 99 ശതമാനവും അതൊരു പീഡനമായിരുന്നു.എന്നിട്ടും പുരുഷന്മാരാരും ഷേവിംഗ് നിര്‍ത്തിയില്ല. ആരും മുഖത്തെ രോമം കളയാന്‍ വാക്സിങ്ങോ ക്രീമുകളോ ലേസറോ  ഉപയോഗിക്കുന്നില്ല.ഒരു കുത്തകയും അത്തരം സാധനങ്ങള്‍ പുരുഷന്മാര്‍ക്കായി ഉണ്ടാക്കുന്നില്ല.എന്തുകൊണ്ട്?നമ്മുടെ പോപ്പുലര്‍ തിയറിയായ കോര്‍പ്പറേറ്റുകളുടെ മസ്തിഷ്ക്ക പ്രക്ഷാളനം എന്ന  വാദം ശരിയാണെങ്കില്‍ പുരുഷന്മാര്‍ക്കുള്ള ഒരു ഹെയര്‍ റിമൂവര്‍ ക്രീമൊക്കെ നിഷ്പ്രയാസം മാര്‍ക്കറ്റു ചെയ്യാന്‍ കഴിയേണ്ടതാണ്.എന്തുകൊണ്ട് ആരും അത് ചെയ്യുന്നില്ല?

താടിമീശകള്‍ പാടെ കളയുമെങ്കിലും ഒരിക്കലും സ്ത്രീകളെപ്പോലെ മിനുസമുള്ള മുഖം പുരുഷന്‍ ആഗ്രഹിക്കുന്നില്ല.The general principle is make as much difference in your appearance as you can between a child or a female.ബ്ലേഡ് നിര്‍മ്മാതാക്കള്‍ സ്മൂത്ത് ഷേവ്‌ എന്നൊക്കെ പരസ്യം ചെയ്യുമെങ്കിലും പൊതുവേ ആരും അതത്ര കാര്യമായി എടുക്കാറില്ല.Perfectly smooth shave is not  macho.Stubble or what they call "five o'clock shadow" is more sexy.ഇപ്പോള്‍ സ്ഥിരമായി ഈ കുറ്റിത്താടി നിലനിര്‍ത്താന്‍ സഹായിക്കുന്ന ഷേവറുകളുണ്ട്.(ഇത്തരം ഷേവറുകള്‍ കുത്തക കമ്പനി  ഉണ്ടാക്കി പരസ്യം വഴി അടിച്ചേല്‍പ്പിക്കുന്നതല്ല,മറിച്ച് പുരുഷന്മാരുടെ താല്പര്യമനുസരിച്ച് കമ്പനികള്‍ ഉണ്ടാക്കി വില്‍ക്കുന്നതാണ്.So much for the theory of corporates controlling our lives.)

'Five o'clock shadow' ഇല്ലെങ്കിലും ആവര്‍ത്തിച്ചു ഷേവുചെയ്താല്‍ മുഖത്തിന്റെ ആ ഭാഗങ്ങള്‍ക്ക് ഒരു ഇരുണ്ട പച്ചനിറം ഉണ്ടാകും.നല്ല വെളുത്തവരില്‍ ഈ നിറവ്യത്യാസം കൂടുതല്‍ പ്രകടമായിരിക്കും. ആ നിറവ്യത്യാസം വളരെ പ്രധാനമാണ്.ആരും മേയ്ക്കപ്പുകൊണ്ട് ഒരു രീതിയിലും ഈ നിറവ്യത്യാസം മറയ്ക്കാറില്ല.(പുരുഷന്മാര്‍ക്കുള്ള ബ്ലീച്ചിംഗ് ക്രീമുകളുടെ പരസ്യത്തില്‍ പോലും  ഈ പച്ചനിറം മാറുന്നതായി കാണിക്കാറില്ല.) കുറ്റിത്താടിയും താടിയുടെ ഈ നിഴലും മുഖത്തിന്റെ ല്യൂമിനോസിറ്റി കോണ്ട്രാസ്റ്റ് കുറയ്ക്കും എന്ന് പറയേണ്ടതില്ലല്ലോ,പ്രത്യേകിച്ചും വെളുത്ത  മുഖങ്ങളുടെ.ടീനേജ് പ്രായത്തില്‍ ബീഡിവലി തുടങ്ങിയ പലരും പുകവലിക്കാനുള്ള താല്പര്യം കൊണ്ട് മാത്രമല്ല ചുണ്ടുകള്‍ കറുക്കാന്‍ കൂടിയാണ് അത് തുടങ്ങിയത് എന്ന് പറയാറുണ്ട്.(ടീനേജ്  പെണ്‍കുട്ടികള്‍ ആ പ്രായത്തില്‍ ലിപ്സ്റ്റിക്കാണ് ഉപയോഗിക്കുക.) ല്യൂമിനോസിറ്റി കോണ്ട്രാസ്റ്റ് മാനിപ്പുലേറ്റ് ചെയ്യുന്നതിന്റെ രീതികള്‍ നമുക്ക് സഹജമായി മനസ്സിലാകുന്നതായിരിക്കാം എന്നനുമാനിക്കാം  അല്ലെ?
---------------------------------------------------------------------------------------------

മേയ്ക്കപ്പിന്റെ ചരിത്രം വിട്ട് ഇനി നമ്മള്‍ ഫോട്ടോഗ്രഫിയിലേക്ക്.പണ്ട് പണ്ട് ബ്ലാക്ക്‌ ആന്‍ഡ്‌ വൈറ്റ് ഫിലിമിന്റെയൊക്കെ കാലഘട്ടത്തില്‍ ഗ്ലാമര്‍ ഫോട്ടോഗ്രഫിയില്‍ ഉപയോഗിച്ചിരുന്ന ഒരു  സൂത്രമുണ്ടായിരുന്നു.ഒരു ചുവന്ന ഫില്‍റ്റര്‍ ലെന്‍സിനുമുകളില്‍ ഉപയോഗിച്ച് ബ്ലാക്ക് ആന്‍ഡ്‌ വൈറ്റ് പടങ്ങളെടുക്കുക.തൊലിയിലുള്ള ചെറിയ ചുളിവുകളും പാടുകളുമൊക്കെ അപ്രത്യക്ഷമായി നല്ല  വെളുത്ത് ഗ്ലാമറാകും.(Since a major component of skin is red you are in effect overexposing the skin portion only, thus blowing out the imperfections and help increasing the luminosity contrast.) ഇങ്ങനെ ചുവന്ന ഫില്‍ട്ടറിട്ടെടുക്കുന്ന ബ്ലാക്ക് ആന്‍ഡ്‌ വൈറ്റ് ഫോട്ടോകള്‍ക്ക് ഒരു പ്രത്യേക ഭംഗിയായിരിക്കും.ഏത് ഹോസ്റ്റല്‍ മുറിയുടെയും ചുവരുകള്‍ അലങ്കരിക്കുന്ന ഹിന്ദിയിലെയും  ഹോളിവുഡ്ഡിലേയുമൊക്കെ പഴയകാല നടിമാരുടെ ഗ്ലാമര്‍ പോസ്ററുകള്‍ മിക്കവാറും ഇത്തരത്തിലുള്ളതായിരിക്കും.ഇതിന്റെ മറ്റൊരു രൂപമാണ്,നമ്മുടെ പഴയ സ്റ്റുഡിയോ ഫോടോഗ്രഫര്‍ ചുവന്ന മഷി  കൊണ്ട് നെഗറ്റീവ് ടച്ച്‌ ചെയ്തിരുന്ന വിദ്യ.ആളെ പരമാവധി വെളുപ്പിക്കുന്ന ആളായിരുന്നു അക്കാലത്തെ മികച്ച ഫോട്ടോഗ്രാഫര്‍ ‍.(ഓ:ടി:ഫോട്ടോഗ്രാഫി എന്നാല്‍ യഥാര്‍ത്ഥത്തില്‍ കണ്മുന്നിലുള്ളത്  അതേപോലെ പകര്‍ത്തുകയായിരുന്നു പണ്ടുള്ളവര്‍ ചെയ്തിരുന്നത് എന്നും അതാണ് യഥാര്‍ത്ഥ ഫോട്ടോഗ്രാഫി എന്നും വാദിക്കുന്ന 'ശുദ്ധഫോട്ടോഗ്രാഫി'യുടെ വ്യക്താക്കളുടെ അറിവില്ലായ്മയോടുള്ള  എന്റെ പുച്ഛം രേഖപ്പെടുത്തിക്കൊള്ളുന്നു.:-) അതു സംബന്ധമായ ചര്‍ച്ചയൊക്കെ എന്റെ പഴയ ഏതോ പോസ്റ്റിലുണ്ട്.)

ഞങ്ങള്‍ ദിനോസാര്‍ കാലഘട്ടം മുതല്‍ ഫോട്ടോഗ്രാഫി ചെയ്തിരുന്നവര്‍ (ഞാന്‍ ഫോട്ടോഗ്രാഫി തുടങ്ങീട്ട് വളരെ കാലമായി.) ഉപയോഗിച്ചിരുന്ന ഈ റെഡ്‌ ഫില്‍റ്റര്‍ സൂത്രം അതിന്റെ പുറകിലുള്ള  തിയറി മനസ്സിലാക്കിയാല്‍ നമ്മുടെ ഡിജിറ്റല്‍ ബേബികള്‍ക്കും ഉപയോഗിക്കാം. ഫോട്ടോഷോപ്പിലോ മറ്റോ നിങ്ങളുടെ ഫോട്ടോയുടെ റെഡ്‌ ചാനല്‍ മാത്രം ഒരു  ഒരു ബ്ലാക്ക്‌ ആന്‍ഡ്‌ വൈറ്റ്  ചിത്രമാക്കുക. ചുവന്ന ഫില്‍റ്ററുപയോഗിച്ചെടുക്കുന്ന ബ്ലാക്ക് ആന്‍ഡ്‌ വൈറ്റ് ഫിലിം ചിത്രം പോലിരിക്കും.(ചാനല്‍ പാലറ്റില്‍ നോക്കിയാല്‍ റെഡ്‌,ഗ്രീന്‍,ബ്ലൂ ഇവ മൂന്നും ബ്ലാക്ക് ആന്‍ഡ്‌ വൈറ്റ്  ചിത്രങ്ങളായി കാണാം.അതില്‍ ല്യൂമിനോസിറ്റി കൊണ്ട്രാസ്റ്റ്‌ ഏറ്റവും കൂടുതല്‍ റെഡ്‌ ചാനലിനായിരിക്കും. ഏറ്റവും കുറവ് ബ്ലൂ ചാനലിനും.അതുകൊണ്ട് അതില്‍നിന്ന് റെഡ്‌ മാത്രം കോപ്പി ചെയ്യുക.) പണ്ട്  ഞാന്‍ ഗ്ളാമര്‍ റീട്ടച്ച് ചെയ്ത (ഡിജിറ്റല്‍ പ്ലാസ്റ്റിക് സര്‍ജ്ജറി..) ഒരു ഫോട്ടോയുടെ റെഡ്‌ ചാനലും അതിന്റെ തന്നെ ഏറ്റവും കോണ്ട്രാസ്റ്റ് കുറഞ്ഞ ബ്ലൂ ചാനലുമായുള്ള  വ്യത്യാസം നോക്കുക.ഏതാണ്  കൂടുതല്‍ ഗ്ളാമറസ്സ്?

(ഓ:ടി:ഫോട്ടോഷോപ്പ് താല്പര്യമുള്ളവര്‍ക്ക് ഒരു high end photoshop tip: തൊലിയിലെ മിക്കവാറും അടയാളങ്ങളും പാടുകളും ഗ്രീന്‍ ചാനലിലാണ് കൂടുതല്‍ വ്യക്തമാകുക.അതുകൊണ്ട് ക്ലോണ്‍ സ്റ്റാമ്പ്‌  ഗ്രീന്‍ ചാനലില്‍ മാത്രം ഉപയോഗിക്കുക.ഏറ്റവും 'വൃത്തികെട്ട' ചാനല്‍ ബ്ലൂ ആയിരിക്കും.പലപ്പോഴും ബ്ലൂ ചാനല്‍ മാത്രം അല്‍പ്പമൊന്ന് ബ്ലര്‍ ചെയ്യുന്നതും നല്ലതാണ്.കൂടുതല്‍ കടുത്ത നടപടിയെന്ന  നിലയില്‍ ചിലപ്പോ ബ്ലൂ ചാനല്‍ അപ്പാടെ മാറ്റി പുതിയതൊന്നു ചേര്‍ക്കാറുണ്ട്,പ്രത്യേകിച്ചും പഴയ ഫോട്ടോകള്‍ റീട്ടച്ചു ചെയ്യുമ്പോള്‍ .‍The exact method is too complicated to explain here.)

വേറൊരു സൂത്രം കാണിച്ചുതരാം. ദിലീപിന്റെ പെണ്‍വേഷമാണ് ഈ ചിത്രത്തില്‍ ‍. (Btw, ദിലീപിന്റെ ഈ  ചിത്രത്തിലെ മേയ്ക്കപ്പ് കൊള്ളാം. പെണ്ണായിമാറ്റാന്‍ വെറും കണ്ണെഴുത്തും പൊട്ടുകുത്തും  മാത്രമല്ല ആണിന്റെയും പെണ്ണിന്റെയും മുഖത്തിന്റെ 'ദ്വിദീയ ലൈംഗിക ലക്ഷണ'ങ്ങളേക്കുറിച്ച് (Secondary sex characteristic) ഏതാണ്ടൊരു ഐഡിയ ഈ മേക്കപ്പ്മാനുണ്ടെന്നു വ്യക്തമാണ്.)

ഒറിജിനല്‍ ചിത്രത്തിന്റെ റെഡ്‌ ചാനലും(നമ്മള്‍ കണ്ടപോലെ ഏറ്റവും കൂടുതല്‍ luminosity contrast.) ബ്ലൂ ചാനലും(ഏറ്റവും കുറവ്  luminosity contrast) ഇവിടെ കാണിച്ചിട്ടുണ്ട്.റെഡ്‌ ചാനലിനാണ്  ഒറിജിനല്‍ കളര്‍ ചിത്രത്തേക്കാള്‍ കൂടുതല്‍ സ്ത്രൈണത എന്നു കാണാം.(ഈ ചിത്രത്തിന് ഷീലയുടെ ഛായ തോന്നുണ്ടോ ആര്‍ക്കെങ്കിലും?) ബ്ലൂ ചാനലിന് ഏകദേശം ഒറിജിനല്‍ പുരുഷ ദിലീപിനോട്  കൂടുതല്‍ സാമ്യം തോന്നാം.(മറ്റു സ്ത്രൈണ പുരുഷ സൂചനകള്‍ കാഴ്ചയെ സ്വാധീനിക്കാതിരിക്കാനാണ് ചിത്രത്തിന്റെ മുഖം മാത്രം ക്രോപ്പ് ചെയ്തത്. ഒറിജിനല്‍ ചിത്രത്തിലുണ്ടായിരുന്ന നെറ്റിയിലെ  പൊട്ടും ഞാന്‍ മായ്ച്ചിട്ടുമുണ്ട്.)

നമ്മള്‍ മുകളില്‍ കണ്ട illusion of sex ചിത്രംപോലെതന്നെയാണ് ഇതും. ല്യൂമിനോസിറ്റി കോണ്ട്രാസ്റ്റ്‌ കൂടിയ ചിത്രം കൂടുതല്‍ സ്ത്രൈണതയുള്ളതും കുറഞ്ഞ  കോണ്ട്രാസ്റ്റുള്ള ചിത്രം പൌരുഷമുള്ളതായും തോന്നിക്കുന്നു. ഇതെ എഫ്ഫക്റ്റ്‌ കമല്‍ഹാസന്റെ അവ്വൈഷണ്‍മുഖി ചിത്രത്തിലും കാണാം. ഷണ്‍മുഖിയുടെ ബ്ലൂ ചാനലില്‍ സ്ത്രീയായ ഷണ്‍മുഖിയെക്കാള്‍  മുന്നിട്ടുനില്‍ക്കുന്നത് പുരുഷനായ കമലഹാസനായിരിക്കും.

ഫോട്ടോഗ്രഫിയില്‍തന്നെ high key photography എന്നൊരു സങ്കേതമുണ്ട്.പേര് സൂചിപ്പിക്കുന്നപോലെ കൂടുതല്‍ വെളിച്ചമുള്ള ഫോട്ടോഗ്രാഫി രീതിയാണിത്.The picture is bright but not just  overexposed.പലര്‍ക്കും ഹൈ കീ എന്നാല്‍ ഓവര്‍എക്സ്പോസ്ഡ് ഫോട്ടോ എന്നൊരു തെറ്റിദ്ധാരണയുണ്ട്.) വളരെ ഗ്ളാമറസ്സായ,ഹാപ്പിയായ പോര്‍ട്രേറ്റുകള്‍ക്കാണ് ഈ രീതി യോജിക്കുക.ഹൈ കീ  ഫോട്ടോഗ്രാഫിയുടെ ഒരു ഫോട്ടോഷോപ്പ് സിമുലേഷന്‍ ഇവിടെ കാണിച്ചിരിക്കുന്നു.ഇവിടെയും നമ്മുടെ ശ്രദ്ധയാകര്‍ഷിക്കുന്നത് ഈ തരം ചിത്രങ്ങളുടെ കൂടിയ ല്യൂമിനോസിറ്റി കൊണ്ട്രാസ്റ്റാണ്.

ഇത് പറയുമ്പോള്‍ ഒരു വിവാദത്തേക്കുറിച്ചുകൂടി പറയാം.ലോറിയലിന്റെ ഒരു പരസ്യത്തില്‍ ഫ്രിഡ പിന്റോയെ കൂടുതല്‍ വെളുപ്പിച്ചു എന്നൊരു വിവാദം ഉണ്ടായിരുന്നു കഴിഞ്ഞ വര്‍ഷം.ലോറിയലിന്റെ  ഔദ്യോഗിക വിശദീകരണം അത് മനഃപ്പൂര്‍വ്വമല്ലെന്നും ശക്തി കൂടിയ സ്റ്റുഡിയോ ലൈറ്റുകള്‍ ഉപയോഗിച്ചതുകൊണ്ടുമാണെന്നാണ്.''This campaign was meant to highlight Freida Pinto’s make-up  colors applied on her eyes and lips.Thus, some powerful studio lightings with ring-flash have been used for this purpose to create a ‘runway’ effect on the picture.There has been no  whitening retouching process whatsoever on Freida Pinto’s face.''

ഫോട്ടോഗ്രാഫിയെക്കുറിച്ച് ഒരു ധാരണയുള്ളയാള്‍ എന്ന നിലയില്‍ ലോറിയലിന്റെ വിശദീകരണം എനിക്ക് തൃപ്തികരമായി തോന്നുണ്ട്.വെളുപ്പിക്കാന്‍ ഡിജിറ്റല്‍ മാര്‍ഗ്ഗങ്ങള്‍ തന്നെ വേണമെന്നില്ല.  മേയ്ക്കപ്പിന് പ്രാധാന്യം കിട്ടാന്‍ അല്പം ഹൈ കീ ലൈറ്റിംഗ് ഉപയോഗിച്ചതാകാം. എന്തായാലും രണ്ടു പടങ്ങളും തമ്മിലുള്ള ല്യൂമിനോസിറ്റി കോണ്ട്രാസ്റ്റ് ശ്രദ്ധിക്കുക.

(അല്ലെങ്കില്‍ തന്നെ ജന്മനാ സുന്ദരികളായവരെ  ഉപയോഗിച്ച് നല്ലൊരു മേക്കപ്പ്മാന്റേയും ഫോട്ടോഗ്രാഫറുടെയും ഒരു നല്ല ഡിജിറ്റല്‍ ആര്‍ട്ടിസ്റ്റിന്റേയും സഹായത്തോടെ നിര്‍മ്മിക്കുന്ന ഒരു ഫാന്റസിയാണ് പരസ്യങ്ങള്‍  എന്ന്  മനസ്സിലാക്കാന്‍ മാത്രം മൂളയുള്ളവരൊന്നുമല്ല ഈ പരസ്യങ്ങളുടെ പൊളിറ്റിക്കല്‍ കറക്റ്റ്നസ്സ് അന്വേഷിച്ചു പോകുന്നത്‍.അത് യഥാര്‍ത്ഥമാകണമെന്നു വാശിപിടിക്കുന്നത്.)

തല്‍ക്കാലം വെളുപ്പിനെക്കുറിച്ചുള്ള ഈ പോസ്റ്റ്‌ ഇവിടെ അവസാനിപ്പിക്കാം.അപ്പോള്‍ ഇവിടെ പറഞ്ഞു വരുന്നതിന്റെ സാരംശം എന്താണെന്നു വച്ചാല്‍ കറുത്ത പൌഡറിന്റെ കാലം വരാന്‍  പോകുന്നില്ല.White powder rules.വെളുത്ത നിറത്തിന് ലഭിക്കുന്ന പ്രാധാന്യത്തിന് സാധാരണ നമ്മള്‍ മനസ്സിലാക്കുന്നതിനേക്കാള്‍ ഗഹനതയുണ്ട്ഞാന്‍ പലപ്പോഴും എന്റെ പല പോസ്റ്റുകളിലും സൂചിപ്പിച്ചിട്ടുള്ള കാര്യം തന്നെയാണ് ഇപ്പോഴും പറയാനുള്ളൂ........If you catch yourself thinking,''it's obvious'',remember nothing is obvious in this world.Even a spherical earth revolving around the sun isn't obvious.If some idea appeals to your common sense,then it is not the whole truth.If it makes you feel good,then it is not the whole  truth.If it agrees with your favorite ideology,then it is not the whole truth.If it panders to your self designated progressive image and makes you feel all warm and fuzzy,then it is not the  whole truth.If you think you know the answer to a problem without much thinking or study,probably you are wrong.

സൌന്ദര്യത്തേക്കുറിച്ചുള്ള കൂടുതല്‍ കാര്യങ്ങള്‍ മറൊരു പോസ്റ്റില്‍ ‍....
-

8 അഭിപ്രായങ്ങൾ:

ഷാരോണ്‍ പറഞ്ഞു...

നന്നായി.
പോസ്റ്റിനു വേണ്ടി ചെയ്യുന്ന ഹോംവര്‍ക്കുകള്‍ക്ക് സ്പെഷല്‍ കയ്യടി..

ശിശു അനുകരനത്തെ പറ്റി ഞാന്‍ ഈയിടെ ഒരു പോസ്റ്റില്‍ പറഞ്ഞിരുന്നു.
അത് ഞാന്‍ വായിച്ചത് ഡെസ്മണ്ട് മോറിസ്സിന്റെ The Naked Woman-A Study of the Female Body പുസ്തകത്തില്‍ ആണ്.

നേരം കിട്ടിയാല്‍ ഈ പോസ്റ്റ്‌ ഒന്ന് വായിക്കുക...

"നിങ്ങള്‍ പെണ്ണുങ്ങള്‍"

http://urakke.blogspot.in/2012/03/blog-post.html

ഇവല്യൂഷന്‍ തീയറിയൊന്നും ആധികാരികമായി അറിഞ്ഞിട്ടല്ല. ചുമ്മാ വായിച്ച കുറച്ച് പുസ്തകങ്ങളുടെ ബലത്തില്‍ കാച്ചിയതാണ്.

Captain Haddock പറഞ്ഞു...

ഇപ്പഴാ മൊത്തം വായിച്ചു കഴിഞ്ഞത്. താങ്ക്സ് എ ton !!!!!

z4r പറഞ്ഞു...

Fantastic posts! I enjoyed it especially since I had very recently verified my (closet) preference for white faces using the Implicit Assessment Test. I agree that these preferences have evolutionary origins but can we ignore the role of culture in amplifying it?

z4r പറഞ്ഞു...

I have one more question. The ratio of women preferring dark faces is higher than men preferring dark faces. But do women in general really prefer darker faces? How can we explain the market for Fair and Handsome?

bright പറഞ്ഞു...

@ ഷാരോണ്‍
Thanks for the link.Desmond Morris is just repeating the same thing over and over in all his numerous books.If you have read one you have read it all.Now I find his books boring. Btw infant mimicry was first put forward by Konrad Lorenz(Nobel prize 1973).I think I have mentioned it in my post on Teddy bear.

@ Captain Haddock
Thank you.:-) It is people like you who keep me blogging.

@ z4r
I think it's not actually women prefering darker faces,but it's just that they don't give it much importance,(i.e, compared to males) or skin color is much lowewr on their list of things to look for in a partner.

About Implicit assessment test.I was hoping that some ''politically correct progressive wannabe'' would come and wax eloquent in these posts about how he disregard skin color and is always on a look out for that 'inner beauty' so that I could ask him to take Implicit assessment test and then come back with his score.:-)

https://implicit.harvard.edu/implicit/Study?tid=-1

umesh mc പറഞ്ഞു...

hoo itrayum homeworkokke cheyda ee postinu 5 comment matramoo.... kashtom

sadanom polichu ...

njan oru life time member ship edukunnu...

Harinath പറഞ്ഞു...

വിശദമായി വായിച്ചുനോക്കുന്നതേയുള്ളൂ. എങ്കിലും പറയാം EXCELLENT.
Very informative, very good presentation.

K.P. Sukumaran പറഞ്ഞു...

:)

LinkWithin

Related Posts with Thumbnails